應對Ｌiu Sir 的坐長途機之苦。

跟網友 Liu Sir 講起, 從僑居地返國內及香港乘搭長途飛機的苦惱, 勾起陳年往事, 每一個人的命運都不同, 有人一世好運, 有人做什麼事情都有阻滯, 好多時候無法解釋, 老鬼想當年第一次出國, 果種無端白事的煩惱令人束手無策, 尤其那個時代, 華人都是受到或多或少的另類對待, 今天的小朋友,特別是香港的小朋友,不知是否教育當局對歷史的教育沒有興趣或者是特別淡化,淡忘歷史,另一方面,坊間"有心人"太多,都是灌輸反面及負面民族資訊, 至令那些小朋友不知"所謂"的去"懷緬"那個時代的那個世界,憾事也, 老鬼只是如我自己遭受遭遇的那個時期那個世界, 不過人各有不同, 可能同是那個時期,有人有非常好的遭遇也不定, 那些人自然會對那個時候那個政府會深為感激。

平生第一次坐飛機就是上圖那款英國三义戟航機。

 (圖來自互聯網Airliners.net 版權屬於Mr. Andrew Abshier)

一生人第一次坐飛機七十年代初,係做傍友隌同我任兼職的電子廠的老細從香港去廣州,一起飛,未坐定,到了!!!當時是英國佬的三义戟, 林永遠健康坐果隻,飛機隔聲很不好,噪音非常。

七八年第一次遠渡重洋,從香港乘英航到英公總公司學習及訪問所代理的英國廠商, (剛從B.O.A.C改為Britsih Airway無幾耐, 是當時最新的波音747, 出發時,大陣象了,成棚人來啟德送機,好似生離死別咁,主要是公司很少會派華人職員到總公司學習的,若干年才有個名額。

 上圖是BOAC二戰後所用的美波377客機。

 上圖是英國名航機VC-10。後來又是被工會搞跨咗間廠,至被美國後來居上,壟斷世界航機生產,直至空客公司出現。

 波音747初出世,BOAC就用了。

(以上圖片皆來自互聯網)

註: BOAC 相當年是世界首屈一指的泛世界客機服務公司,美國佬尚未成形, 可惜, 被李乜人嘅祖師(偽工運人士) 果類工棍搞死咗。

當時長途機還未能完全直航, 要停幾個站,第一個,巴基斯坦喀拉蚩,加油,第二個杜拜,加油,加油期,有識途老馬會下去機塲休息。

老鬼初出埠,慌失失,唔敢,只有係座位乾等, 係杜拜,唔知點解, 加油加到滿地都係, 老鬼坐嘅位剛好見到晒,啲中東佬係度鬼殺咁嘈,(我係機內,當然聽唔到,但係睇到佢地指手劃腳，頓頭頓爪, 口噏噏, 亂成一片, 冇幾耐,有消防車到, 幾個神高神大中東佬消防員, 拚晒老命咁拉條水喉出來,點知忙中有錯, 條喉打咗"節"拉唔開, 左抽右扯,先之伸直, (香港消防,全世界最醒, 不過今時今日如何, 唔知咯)  開水射散地上燃油, 老鬼心想, 呢次如果有人唔覺意,整著啲火, 就係咁大了。心中驚,但係唔知點做, 直至, 好耐,好耐,好耐, 落咗機嘅同新上機嘅返晒嚟, 跟住話要到飛, 然後至放下心頭石。

跟住起飛去大英倫敦, 七八九個鐘頭去到上空, 一片雲霧, 白矇一片,到飛極都唔到, 感覺架飛機團團轉, 唔知幾多個鐘頭, 宣佈天氣不好, 太大霧, 未能降落, 要轉飛德國, 慘! 因為總公司人事部已派人接我機, 咁, 點算?
飛機過了英倫海峽, 到了德國法蘭福克機塲, 天氣一樣唔好, 又係打轉, 最後”迫降”, 成機人都已經坐到吽咗, 蒙咗, 儍咗, 還有成機佔大部份係新界人, 好多都係第一次出門, 個個徬徬徨徨, 當然包括在下, 果陣航行公司比宜家細心得多, 派人照顧, 入了機塲分隔室, (當時中國未強大, 中國人被視為次等人, 名為照顧,實為監視, 因為外籍人士另有安排。 )

我地當時係攞 BOS, 果陣時仲未有BNO, 我唔好彩, 十八歲果年, 英國佬開始出賣殖民地臣民, 發明了BOS, 我早一年出世, 就有資格攞正式"不替薯””爬薯卜”了。 BOS 樣子跟正式英護照一樣, 內人又係九成九一樣, 比BNO正規一些, 只係係開頭篇文字加上一句, 持護照人並不自動有居英權, 咁就香港臣民馬上成等公民! 其他國家一見, 馬上打醒精神, 呢位仁兄或仁姐係假英國人, (所以唔明點解家陣香江有班大帝成日舞之米字獅龍旗出嚟哭哭鬧鬧要向大英詐嬌, 真係唔明!)。

成班人飢、渇、攰交迫, 航空公司派三明治, 不過當年仲未太興瓶裝水, 唯有飲生水。 

等等等,等到晚上成九點幾, 最後航空公司擔保入境, 去德國海關排隊做臨時入境紙, 攪咗一輪, 航空公司安排大巴士,送去機塲附近酒店, 到酒店, 又攪咗一輪, 分配好房, 開餐!

嘩, 餓鬼搶屎嚟形容, 十分貼切, 哈!嗱! 家陣香港人好鬼屎忽, 成日鬧河之北嘅人冇規矩,冇文明, 唔識跟住嚟,唔識排隊, 其實香港人好唔到幾多咋, 當年, 一樣....搶!搶!(其實今時今日香港人都係咁, 如你參加個旅行圔, 去食飯或去做乜嘢, 今時今日嘅香港人,不論大小老幼,不也一樣係”搶”, 香港人不論後生、中年、老年、少年、細路仔, 男女老幼, 最用得多嘅詞語係…"霸位"二字, 到今時今日,竟是越來越普遍,今次回港, 更三番四次在地鐵及公車被"土生香港年青男女"搶位、霸位, 心痛兼心實。舊年, 好惜我嘅細姪女,請我去尖沙咀某大酒店食自助餐, 唔平㗎, 到有啲”著數”食物出嚟, 唔係又係lady and gentlemen 一齊忘記了佢地鬧人唔文明, 嘲人冇規矩嘅野, 佢地做埋一份!!!) 當時老鬼對這現象, 並沒有一絲毫”反感”, 因為人本是自私個體, 人不為己, 天誅地滅, 究其實質, 人其實係動物種, 這是天性, 而且, 二十幾三十個鐘頭困在鐵皮箱內的痛苦, 飢渴, 這種急燥行為完全係自然。

中華人,不論是香港人, 馬華人, 加籍華人, 美籍華人, 英籍華人, 强國人, 弱國人都是同DNA, 什麼DNA? 為兒為女是也! 

當時有攜帶小童的人, 首先爭奪頭籌, 去搶奪!!!!給他她們的子女也! 其道德情操, 多麼偉大, 不是那些唸了幾年洋書,洋文, 身變中產, 身為高等華人, 高等學人, 高等知識份子那樣, 站於他她們的所謂”文明,文化,情操”指三駡四, 以證明他她們高人一等!!! 

閒話不提,轉回第一次出洋, 辛苦困窘的往事。

吃完大餐, (最記得者,係酒店整咗味,西洋菜釀雞,西餐嚟㗎,至今尚記起該雞的美味, 主要因肚餓) 上房瞓, 第二天一早, 集合, 全體華人(港人)再被”押”去機塲, 又再上機, 等待!!!等等等,好了,起飛了, 好快過了英倫海峽, 倫敦依然迷惘, 再次兜圈, 最後,最後, 飛機降落了, 出海關, 英國佬關員攞起我本BOS, 左看右睇, 左問右問, (當時英政府講過, BOS 同正式英護照大致一樣, 其實係好大分別。)慌死我去攞著數, 好在公司準備晒公司介紹信,來回機票,這個那個, 那位關員雖然又係這個那個, 最後都吸印放我入境! 不過, 我張入境紙果欄, 我填嘅國籍,被佢打咗交义,(我係跟英國護照填, British) 劃咗, 然後用佢嘅好難睇嘅英文寫上"Hong Kong”二字!從這一刻開始, 我對事頭婆張相講聲"再會"了,人地都唔認你為自己人, 為何仲要監人賴後?

在英期間, 屢遇”略帶”歧視待遇, 那時是七十年代後期, 所以對於今天的香港某曾用阿爺銀紙去英留學嘅某大本姓曹的陶乜才子今時今日猛咁跴阿爺,同猛讚米字旗, 老鬼有啲奇怪, 莫非佢係當時英國從未有過”不愉快”經驗, 不過佢係去讀書, 老鬼係去學師, 可能大不同。

這一次, 一生人處男渡洋乘飛機”悲劇”, 由出發起至入英國境, 前後多少時間……?

超過三十小時!!!!

到埗之時, 星期天, 出到機塲, 舉目無親, 總公司派來的人當然唔會出現, 因為佢都唔知點接我好, 有公眾電話亭, 不過唔識點打, 問路, 一開口, 冇人聽得明香港仔講嘅英文, 原來香港人又係夜郎自大, 成日嘲笑星架坡佬及印度佬嘅英文, 原來香港仔英文一樣, 五十步笑百步, 好多香江老師教的, 包括果時才子乜家傑教嘅英文, 係”唔啱”嘅, (家陣一樣, 你去聽一聽何俊人大律師的英文, 你去聽一聽嫁咗鬼佬幾十年嘅毛姑姑姐姐嘅英文, 老鬼唔敢批評, 不過經驗就是經驗,出咗鯉魚門, 香港人的英文什麼也不是!) 本身英文及英語就是差, 再加幾十個鐘頭混沌, 更加忙無頭緒, 拿著行李在機塲出口, 人生路不熟, 茫然若失, 怎辦???

老安强調, 以上乃老鬼當年不幸遭遇, 人之命運各有不同, 其他人大都可能是順風順水, 路遇貴人, 永享特權及照顧, 好似劉乜卿姐姐, 李乜銘大狀, 陶乜杰才子, 佢地係英國, 可能如魚得水, 邯鄲學了正步, 漢人學了胡語, 所以一向看不起一眾華人及强國人, 一向汙辱他她們的祖宗。

所以,千萬不要瞎子摸象, 在下所說是在下的經歷, 在下命格唔好, 運唔好,祖宗冇靈致有阻滯而已。

又:如果是今天, 這些延誤發生在强國人身上, 哦!好看了, 有戲了, 他她們肯定不會像我們那時一樣, 有如膏羊,任擺佈, 國强是不是有利呢?