2019年4月21日星期日

秃髪老安話當年之一。打斧頭

秃髪老安話當年之一。打斧頭

想起當年, 荔枝角道的日子, 那個時候, 老安是最後入職的學師仔, 總共三師兄弟, 亞權, 老細姨甥及我, 唔使講, 乜做乜乜嘅嘢梗係最細果個做, 講出嚟好阿Q, 就係咁, "識"好多唔等使嘅嘢!煮大鑊飯!

當年, 該電氣店是行內數一數二, 專接大項目電氣工程, 師傅夾鋪頭先生共二十多人, 開飯要兩圍,設一伙頭負責兩餐, 早飯七點多, 晚飯八點, 鋪頭門市十點, 所以老安工作時間係朝六晚十,年中無休,果陣時並未有完善勞工法例, 老安是"勞伇式"勞工及童工的尾班車乘客,我之後,港英政府一系例勞工法, 從此結束"殖民地"式及"狄更斯"式勞工及童工的悲慘世界。
轉回話題, 伙頭叫"鹽老蘇", 每年梗有二三次請假返大陸探妻兒, 咁, 煮眾人飯責任自自然然落係老安身上, 當年點識煮飯,尤其大鑊飯, 二十幾人, 唔係嘢小, 第一次,伙頭臨放假前一日, 先至教兩招, 叫我睇住佢點煮大鑊飯, 跟住教點煮餸。



No photo description available.

無計, 煮到嚟就食, 第二日, 照板煮碗, 啊哈, 飯是三及弟,餸是唔鹹唔淡, 又鹹又淡, 奇怪, 二十幾個大佬,師傅, 先生, 竟然無發爛乍,無人鬧老安,只有幾個同我講, 阿良, 你好唔掂, 好難食, 自己諗下點改進, 開工。

大師傅"大舊瑞"一改過往兇殘手段, 留低叫我入厨房, 陰聲細氣同埋好耐心咁指出我煮唔掂飯理由, 同埋點可以煮到"仲可以入口"嘅方法!

當年煮飯是用柴的,所謂柴其實是箱頭木板, 隻鑊奇大無比, 可以煮三十人以上米飯, 煮大鑊飯秘訣, 就是收火時間, 水多水少,並不是大問題, 一般情形,幾多米都好, 水一定要過手背, 開猛火, 見到出晒大水氣, 馬上掀起蓋,掹出太多的柴, 用勻逐少逐少勻出米水, 直至見到米飯起水眼, 馬上掹晒柴火, 剩低餘下炭火, 蓋番鑊蓋, 焗佢, 搞掂。

No photo description available.
煮大鑊飯秘訣係當水滾時, 勺米水, 勺到水起火山口形狀時, 蓋好蓋, 掹柴火, 焗到飯熟。


另外一煮餸炒菜秘訣, 豉油、豆粉、糖, 321, 乜都搞定!萬變不離呢三樣。其他任由發揮, 加鹽加辣加乜加物變作各種口味, 最重要是鹽的控制,寧少不要多, 少可加, 多就大鑊, 救唔番。

大舊瑞教路, 人多食飯, 唔使搞咁多花樣, 湯一定要有, 無非幾種, 1、菜乾、白菜煲豬肉。2、清保涼煲排骨, 3青紅蘿蔔煲豬展。

餸菜方面, 1、蒸排骨, 2、菜遠牛肉,3、叉燒炒蛋,4、梅菜蒸魭魚,5、封煎紅衫, 基本滿足眾人肚皮。

如是這般, 每次伙頭放假, 老安頂上, 眾人暗乸底, 出唔到聲!

幾十年後, 自爆契弟, 原來, 伙頭係美國巡洋艦"新澤西",食水夠晒深, 佢每次放假, 同我講, 指定去北河街邊一檔買豬肉, 邊一檔買牛肉, 邊一檔買魚, 邊一檔買菜, "鹽老蘇"叫我去到檔口, 撻朵,話係乜乜電氣老蘇叫嚟, 咁就得啦, 佢地會同你計數,鋪頭俾幾多買餸, 用幾多,剩低嘅, 你袋, 唔好俾番鋪頭。

啊呀! 去到北河街市, 照佢講,某某檔買魚、買肉、買菜, 全部檔口識做, 份量搞定, 錢銀搞定, 嗱師傅仔, 今日你煮乜啦, 教埋!

最後, 發覺鋪頭俾我嘅買餸錢, 原來好過出雙糧! 伙頭放一個禮拜假, 老安多咗差不多一個月人工, (當年月薪得幾十皮, 初一十五各有一元飛髪錢。)原來伙頭咁好搵, 不過食水真係深, 那個時間, 筷子慢的, 唯有食白飯!