【南音】
客途秋恨
涼風有信，秋月無邊。
虧我思嬌情緒，好比度日如年。
小生繆瑾乃係蓮仙字。為憶個多情妓女，嗰位麥氏秋娟。
唉見佢聲色與共性情，堪我贊羨。佢重更兼才貌兩雙全。
今日天隔一方與佢難見面，是以孤舟愁寂，對住晚景涼天。
睇下夕陽對住重有對雙飛燕。虧我斜倚在篷窗我重思悄然。
我耳畔又聽得秋聲桐葉落。又只見平橋衰柳，鎖住寒煙。
唉我呢種情緒悲秋同宋玉。況且在客途抱恨，你話對乜誰言？
正係舊約、舊約難如潮有信。新愁深似海闊無邊。
唉第一觸景更添情懊惱，虧我懷人愁對，呢個月華圓。
又記得青樓邂逅，嗰一晚中秋夜，我共佢並肩攜手，重拜月嬋娟。
唉我亦記不盡、記不盡許多情與義，總係纏綿相愛，又復相憐。
姐呀共你肝膽、肝膽情投，將有兩個月啦嘛。又嚸想同群催趲叫我整歸鞭。唉嗰陣幾回眷戀，共你難分捨，都只為緣慳嗰兩個字，共你拆散段離鸞。
唉嗰陣淚灑西風紅豆樹，情牽古道白榆天。
嬌呀你杯酒、杯酒臨歧，你話同我餞別。
在嗰處望江樓上，重設離筵。
你重牽衣至囑，講及嗰段衷情話，叫我要存終始，叫我兩心堅。
唉今日言猶在耳，嚸想成虛負囉。屈指如今又隔年。
〔略爽〕自古話好事多磨正係從古道，半由人力半由天。
是以風塵閱歷崎嶇苦，雞群混跡暫且從權。
恨我請纓未遂終軍志，再試馬～難揚祖逖鞭。
只學得龜年歌調嗰段唐宮譜，遊戲文章賤賣錢。
指望裴航玉杵共你諧心願，藍橋踐約去訪神仙。
嗰陣廣寒宮殿無關鎖，何愁好月不團圓。
又嚸想滄溟鼎沸鯨鯢變，嗰啲妖氛漫海動烽煙。
是以關山咫尺，今日成千里。縱有雁紮魚書總渺然。
今日聽得羽書馳諜報，又話干戈撩亂擾江村。
嗰陣昆山玉石也遭焚毀，好似避秦男女入桃源。
嬌呀你紅顏命薄定會招天妒。重怕啲賊星來犯個月中仙。
唉嬌花若被狂風損，玉容無主你話倩乜誰憐。
又怕幽蘭不受嗰啲污泥染，你一定拼送香魂玉化煙。
唉若然豔質遭兇暴，我願同埋白骨伴姐妝前。
〔趨快〕或者死後得成連理樹，重好過生前長在奈何天。
重有慈航法力共你行方便，又把楊枝甘露救出火坑蓮。
等你劫難逢凶俱化吉，嗰啲災星魔障兩不相牽。
虧我心似轆轤千百轉，〔吊慢〕空戀眷。
【清唱】嬌呀但得你平安我就願囉。
〔復原〕任得你天邊明月照向別人圓。〔拉腔收〕
【乙反南音】唉聞擊柝，夜三更。只見江楓漁火照住愁人。
虧我幾度徘徊思往事，我都勸嬌何苦，你咁心癡。
自古話風流不少，不少憐香客，正係羅綺還多惜玉人。
估道煙花誰不貪豪富，做乜你偏把多情，總係向住小生？況且窮途作客，我囊如洗，就係擲錦纏頭愧未能。
記得我填詞偶寫，嗰一段《胭脂井》，佢重含情脈脈，對住盞銀燈。
嗰陣細問曲中，嗰段何故事，我就把陳後主嗰一段風流，咁就說過你知聞。〔長序〕嗰陣兵困景陽攪到家國破，歌殘玉樹後庭春。
唉佢攜住二妃，藏在井底，佢重話死生難捨意中人。
佢聽到此言，佢重深歎息，佢重話風流天子，重更情真。
總係唔該享盡咁多奢華福，故此把錦繡江山，一旦毀路塵。
你係女流做乜也曉，又曉得興亡事？不枉梅花為骨雪為心。
你話我珠璣滿腹，又話原無價，我知你憐才情重，重更不嫌貧。
虧我慚非玉樹蒹葭倚，正係蔦蘿絲附，一個木瓜身。等你洗淨鉛華甘謝客，即只望平康早日，共你脫風塵。
恨我樊籠無計，共你開金鎖。又故此鸚鵡羈留，重困住姐身。
況且孤掌難鳴為遠客，虧我有心無力囉，你話幾咁閑文。
唉我欲效藥師，嗰一段紅拂事，共你就改裝夤夜，共妹去私奔。
又怕相逢不是、不是虯髯漢，嗰陣陌路欺人，會惹起禍根。
龍潭虎穴非輕易，嗰陣恩愛翻成，一旦誤姐罷~玉人。
虧我思量銜石，即估話填東海，精衛虛勞一片心。
唉虧我胸中、胸中枉有千條計吔，做乜苦無一策，去挽釵裙…裙…裙。
【轉正線流水】〔稍爽〕唉正係前塵已付東流水，好似春殘花蝶兩相分。
正係神女有心空解佩，做乜襄王無夢枉行雲。
重怕一別永成千古恨，蠶絲未盡枉偷生。
男兒短盡英雄氣，縱使得成富貴亦是閑文。
今日飄零書劍為孤客，又做乜扁舟長夜歎寒更。
只話放開懷抱思往事，嚸知越思、越想、越傷神。
正係風送夜潮寒徹骨，又聽得隔林山寺響鐘音。
聲聲似解、似解相思結，獨惜心猿飄蕩向那方尋。
既是苦海濟人登彼岸，做乜世間留住嗰種情根。
正係風流五百年前債，今日結成夙恨在紅塵。
〔趨快〕又見秋水遠連天上月，團圓偏照別離身。
水月鏡花成幻夢，嚸解茫茫空色兩無憑。
恩愛自憐同一夢，情緣誰為證三生？
今日意中人隔天涯近，空抱恨，【轉乙反】〔吊慢〕琵琶休再問啦。
【清唱】惹起我青衫紅淚，〔復原〕重更銷魂……魂…唔…魂。〔拉腔收〕
沒有留言:
發佈留言