2014年9月22日星期一

回港兩個多月的感想, 一個加燦的自言自語!

二十多年來, 都曾數次返港, 不過每次都是逗留一至二星期, 這次因家事及家鄉事, 停留了兩個多月, 發覺很多人事與景物, 人情及社情, 變化很大了!

打油詩一首咏之:    
    
        單騎匹馬周圍遊,
  遍尋舊雨仍未休,
  景物似熟還陌生,
  千般滋味在心頭!
  無恨感觸舊時臺,
  遍地怱怱仍不改,
  老杇腳步難適應,
  阻頭阻勢實不該!

  港人腳步比昔日還加快,男女老幼表情緊而張! 老鬼真係脫晒節咯! 因行動較慢, 受了不少白眼! 
        剛下機, 兒子沒空接機, 老鬼拖住個喼, 坐機鐵再轉地鐵, 唔知點解, 被好多後生仔, 後生女, 或者壯漢等怒目而視, 好似想食咗我咁,,,,,,,
        問起啲人, 原來佢地話, 你成個亞燦(真係亞燦, 不過係加燦) 咁款, 係人都當你係"豉油痕" 同埋"黃松", 梗係唔LIKE你啦......所以我走果日, 去機塲, 唔敢再搭公交工具, 肉痛痛咁搭"的士"囉!!!


除了辦家鄉瑣碎事外, 三十四,五度的天氣到處逛溜, 心情複雜, 得一"新詩"

        同一的經緯,
  不一樣的時空,
  維海竟不翠綠,
  爐峰頂上竟不藍!
  一步一步還是熟悉,
  景物郤是陌生!
  歌賦街竟無油墨,
  牛腩再也不香,
  可是,,,,人們排隊等候郤忙!
  北角邨何在?
  一步一步街頭徘徊...
  忽然.......
  眼泪兩行!
  這已不是我夢魂中的家鄉......

炎日下於中環海徬望海思往事, 又得一首所謂"新詩"

        三十四度攝氏的中環,
  海濱依然傲慢,
  烈日下的國金,光輝無限!
  可是,連一點蔭影都不留下!
  天星碼頭竟是華麗的佈景板,
  榕樹還是無根,
  往昔印象難再返,
  躑躅間,,,
  三號碼頭外有酒販,冷凍啤酒在其間!
  一杯在手,問一問,遊子幾時會再還?
  難,難,難!




日日閒逛亂蕩, 夜夜胡思亂想, 此次回港, 感觸倍多, 思前想後, 落葉恐怕只會枯殘, 歸根已難成氣候了, 稍後漂回彼岸, 高唱噢! 艱難大而已, 得一結論, 已老莫還鄉, 
  
        還鄉枉斷腸,
  欲尋少年夢,
  只許在黃粱,
  維海翻濁浪,
  舊區遍酒廊,
  人情似流水,
  往事話瀟湘!
  

又, 此次回鄉逗留較久, 發現一現象, 奇實好唔健康!

  香江人人盡低頭,
  手指篤篤從不休,
  唔理茶樓或地鐵,
  睇實個芒亂咁走!
  不分男女兼年幼,
  靚女肥彭排骨秋,
  順嫂細龜阿安伯,
  死人都要網上遊!

好鬼危險架!冇人會睇路,只會頭耷耷!
其實, 香江生活已經好緊張, 健康生活, 應該係係搭車時"透一透、靜一靜, 但係而家個個揸住個手機或者板腦, 扲餐死嘅, 仲緊張過返工, 為乜呢?

         扲少一陣唔使死,
         搭車時要透下氣,
         如何人人丫住晒,
         唔理他人冇碇企!
         猛篤短訊同打機,
         神經緊張到離奇,
         做人為乜咁折磨,
         係咁嚟迫死自己!

最後回港結語: 

香江真係天堂,自由過自由,商塲舖頭乜都有(海漂地款式及種類少同落後好多!), 醫療好到加零一, (剛有二三老友機器壞, 係公家醫院要做手術同檢查, 其完美完善之術前準備, 術後護理, 令老鬼羡慕至死! 老鬼及老伴老病号, 係僑居地入過無數次醫院, 遭遇過好多醫療谷氣事情, 咁先至夠胆講呢段嘢!)

公共交通一流過一流, 公務員"下氣"到我唔好意思!

老鬼唔係講風涼話, 香江人真係身在福中不知福!!!

咁 ! 你會話, 車, 你五毛咋掛, 你話得咁好, 點解你唔馬上回流?

咁! 老鬼駁你, 車, 有早知, 冇乞兒, 早知我留番個住宅單位, 老鬼一早返咗返嚟啦, 家陣返唔到嚟係冇辦法買到"蝸牛", 睇過申請公屋, 雖然仲係三星, 但係要等三年(一年)再次長期定居?先至有資格申請公屋同埋綜援! 果幾年, 劏房租金都攞我命, (地產真係香江之癌症!亦是社會矛盾之根源!)成七十歲人, 百病纒身, 點生存?

香江朋友, 真係睜大雙眼, 睇清楚,,,,,(老鬼個人感覺, 可能唔啱某的人聽, 不過唔好俾定五毛㡌子我戴!)







34 則留言:

Liu 說...

老哥, 我真係越睇就越忍唔住........
[眼淚在心裡流]......
睇完全篇, 真係[淚流滿面].
唔好意思,
我無你大佬咁好文彩, 想回敬幾首打油詩都唔得.
講粗口呢, 我就拍得住黃老霑.
.........................................................
睇完[1971在石澳] , 我就心諗 , [呢位先生文藝氣息好重],
成個70年代書生榜樣.......
絕無誇獎.
只因我曾[活在那個年代].
[[...落葉恐怕只會枯殘, 歸根已難成......]]
或許老哥不知, 十年多前我開[ 壇] , 署的就是 :
[歸也難, 四壁居].
老哥回去還有親人在, 老鬼回去, 俾少個錢, [ 視同陌路],
之後縱有機會回去, 也只能投靠[賓館] 了.
假若不是[借酒消愁]來[自我解嘲] , 怕[ 油尖旺] 的某賓館要加添
一件 [ 客死異鄉] 的新聞了..................................
傾住咁多先, 成樽飲哂 , 冇靈感啦.
去搵周公攞料.....................
[夜來幽夢忽還鄉......................................]

Liu 說...

本來意思係:
[[我無你大佬[懷舊堂主]咁好文彩.............]]
......
哈哈~~~~
醉眼尚未昏花, 腦筋呢, 可就有點不太靈活.

Liu 說...

[[1971在石澳]]
40多年了, 照片依然保存良好 , 黑白分明, 那不是 [奇蹟] , 那是當年的人心, 那是當年的[職業道德] , [社會良心]……………..
………………………………………………………….
看先生的黑白照跟懷舊高人的彩照, 心中有好大感想:
4跟6還是有點距離的.
六/七十年代的HK跟八十年代經濟起飛的HK 還真的不一樣………….
…………………………………………………
呵呵 , 那一副黑框眼鏡 , 還真是我們那年代的[象徵]……………..
哈哈~~~~~~~四眼仔, 睇真D , 真係好有親切感…………..
……………………………………………………………..
上回老哥談到[飲酒]和[憂鬱症] , 令我想起因為找迴文詩而看到的一些資料 :
開首我以為詩是出自[ 李子玉 (李玉瑩)…..李歐梵妻] , 後來查知, 才知是上面[ 江山文學] 網的肖南 的作品(秋.致友人)
……………………………………………………………….
從[李子玉] 居然令我發現患[憂鬱症] 的人還真多, 王安憶先生竟在其內……………………………..
…………………………………………………………....
老哥說得對, 如果不飲酒 , 我可能在中學畢業後就走了…..
因為[憂鬱症] 這東西是殺人於無形的, 也不關乎你[富]與[窮] , [ 有]定[無].
[於今猶在] , 倒要多謝住在老哥那邊Manzanita 區的舊中學同學 , 那時候他差不多每隔一兩晚就打個電話來聊天的, 雖然說的也不是儘是青少年應說的話題………..
…………………………………………………
嘩哈哈~~~~~~~~~~~~
我竟然跟老哥一樣, 在人家的地方說的話竟然比在自己 Blog 說的還多.
唉~~~~~~~~~
我開始明白了一些東西了………….

wei-wei 說...

香港租金在近三年暴漲犀利。要回流定居香江? 難! 難! 難!

秋葉 說...

新界元朗一帶村屋的屋租不太貴,夫妻隱居也適合。

秋葉 說...

內地的醫療費高昂, 對於老人家很不利。所以就有「踫瓷」事件。

Liu 說...

一夜黃梁, 得周公指點, 有詩如下 :

老來皮黃骨瘦
除了一身銅臭
其他一無所有........
羞.
一生只顧上口
竟然忘了下口
末路誰與繼後.....

每餐是空對酒
形單影隻人生
死後只餘[狗] 就.......
醜.

四零後 說...

係枫叶,唔使咁灰噃,你嘅CPP兼埋公司果份,如果係工会工再多一份,冇憂噃!

秋葉 說...

安哥,你在中環港外線拍的照片都很可觀,因為秋葉都很多年沒有去那裡了,現在才見到近貌。
各位咁得閒,不如嚟敝博睇吓我第一次遊坪洲啦。幾年沒出遠門,現在最遠就是去離島咋。hehe !

四零後 說...

坪洲,海漂前常到,因在愉景湾置一單位,周末帶家人去過周末,透氣,多會乘街渡去買餸,順便溜一溜,我家可“近望”坪洲的。
如果不海漂,該單位於今值錢了。
移民代價真不少!

四零後 說...

唔係講風涼話,有時單身未必壞事,如果另一半跟你不合,果種“茶煲”渌都渌死你!
有子女又如何?一樣會各地分飛,好多人子女成羣,一樣孤單寂寞,無一人照顧,果種凄涼無助兼怨憤,更加割肉腕心!
老鬼見盡不少,如我一樣,大的回流,數年才一見,相見亦無言!棧得自我多情,徒添惆悵!

秋葉 說...

安兄以前買了愉景湾一單位,周末才帶家人去過周末,真係好好景喎!
聽聞愉景湾啲屋好靚,賣了真係可惜!我都有一個親戚住在那裡,但我未曾去過。現今本地人心不安,又有人說不如移民了。聽了令人啼笑皆非。

Liu 說...

想起了以前的在MSN寫的一首感懷 :

半世逢場作秀
黑頭終也變白首
眼前無路想回頭
只嘆山長水遠雙足瘦.........
遙想當年年少
風華正茂
滿肚籌謀...........


….....
有事,下次再補寫
匆匆

四零後 說...

小的當年好好彩,老闆對小的非常照顧,又值內地改革開放,營銷上比今時今日容易得多,又得好妻主,並不追求任何名牌,首飾,再說當年愉景灣不貴,還可以負擔!
其實現在香港人(部份人)所追求的都是意識形態上東西,而且推動及煽惑的人多是一是立心不良,二是脫離現實,係度唔怕講,如果照佢地同果位黃乜乜哥哥仔日夜係口邊所講嘅"角仔表唔淮",同"聞煮",楓葉國就"完全"唔合格,如果唔信,去楓葉的官方網站看看他們的議會同憲法組織如何,果位係太學院教憲法嘅"教授"唔知點攞學歷返嚟,,,,不過呢啲唔敢再講了,怕被人拍打!
香港前途如何?真擔心,主要係大仔打死都唔肯再返楓葉,其實好多一起移民的朋友全都回流了,,,,,,點解,你問下佢地咯,不過,好歡迎想移民嘅人過嚟,因為越來越少講廣東話嘅人咯,俾"煲冬瓜強國人"入侵晒,好冇癮!
不過,家陣啲香港朋友成日嗌話移民,咁,問下佢地,受唔受得左隣右里,車前車後,街左街右,銀行食肆都係講普通話,見到都是"黃松"?
香港人連廣東道充斥"黃松"都話頂唔順,咁,佢地去到"溫哥華""烈治文""多倫多""卡加利""愛文敦",都係蹲馬路,講河北,河南話,湖南話,山西話嘅"銅包",咁,係唔係受得落? 騎騎...
小的所住街道二十多年前得我一家"香港人",如今整條街都係"黃松",我對面對老人家仲要係屋門前放"京劇"嚟聽,理得你死人,,,,咁!果啲話想移民怕北岸嘅朋友,過嚟行吓睇下啱唔啱佢地,,,,仲要,要睇專科醫生要等,,,,,等幾耐,天知道,,,,又冇萍果報出頭,點攪?

四零後 說...

一生勞碌四圍走,
如今黑頭變禿頭,
海漂原是行錯路,
無力還鄉因蝸牛!
一生從未風華茂,
學識不夠無咗修,
糊里糊塗又一世,
只有得閒飲下酒!

你都好我好多啦,讀到書,兩餐無忧!睇下幾時落嚟飲茶吹下水啦!

wei-wei 說...

我去年到卡加利, 今年到多倫多都有好多人講廣東話呢! 或者我接觸的都是自己友吧! 不過現在美加的新移民以強國人佔多, 加州的香港廣東人少之又少。

四零後 說...

wei wei 係楓葉咁多老友,當知"瘋孽"實情,不過如果貴親係"廣櫻"時期公務員,食緊糧,唔使做,又或者係加國做到"工會工","政府工",例如公車司機,電燈公司員工等"國企",咁就恭喜佢地,,,,係佢地嚟講,"瘋孽"絕對係"天堂",可以閒事勿理,滑水釣魚,跳老舞一齊嚟!另外高薪糧準,福利一流過一流,兼有額外醫保,連搥骨都包埋!不過好似我啲,左又唔係,右又唔係,咁就淒涼過淒,慘不堪言,(貧、富(公務員同工會佬)懸得好犀利㗎!)
下次再去,順路經過"雲高華"機場轉機,打個電話嚟,請你飲茶食個包,我住嘅地方係"九龍城",你出咗關先至打電話,我十五分鐘內會到!

四零後 說...

如果唔係咁難搵食,果位垃圾局大舊陳姓"二元"都唔會走返嚟躉,死都唔走啦!
老鬼家陣周身病痛,七十咯,攞緊瘋孽類似綜援(算係納咗咁多年稅嘅花紅),寸步不敢離家,呢次返港係想馬上申請香港綜援,個仔都簽咗"衰仔紙",點知話我唔係大陸新移民,係老香港,唔可以即刻做同批,要我返嚟住夠三年(連續計)先至有資格喎,,,,,唉,咁,係唔係唔公平,可惜我唔識李灼仁同梁要中兩位"二元",又冇勇氣搵佢地,(因為我唔識"占終"),唉,唉...

秋葉 說...

看了安兄的自述,真係好同情你們的處境!據知大陸新移民已經不能即來即批領綜援咯噃,除非是小孩子則可以。大陸新移民成年人要住滿七年,才可以領取綜援金。這是當年太多中港婚姻的不利問題出現,由我們一班婦女提出的建議,用以阻嚇貪財的中港婚姻,遏止家庭悲劇的頻頻出現。照計你若有香港的再次換領的身份證,應該立刻批給您的。不過,若您不連續居港七年,現在要求您連續住滿三年,是個折衷的辦法了。
所知數十年前返回大陸定居的香港人,也喪失了香港居民的身份。
除非他們依期回來換領新的身份證吧。

秋葉 說...

如果您有香港居民的身份證,又年滿 65 歲或以上,不計自住居所,個人累積資產(可擁有)限額為二十萬一千元。則可以每人每月領取港幣2千2百多元。是為「長者生活津貼」。這完全不同於綜援金,亦不能是領取綜援金,或傷殘津貼的人士。關於「全民退休保障計劃」,我們爭取了很多年都未成功。至於接力的”黃二元”等出到動到拉布,仍然未竟全功。

wei-wei 說...

據秋葉的消息, 那麼安哥安嫂兩人合共就可領「長者生活津貼」四千四了, 清茶淡飯, 這筆款夠生活開支囉。

覆妄哥: 假如我有機會到「雲高華」, 定必預早通知你。

四零後 說...

過去兩個多月在家鄉香港飲茶食飯次數不少,檔次有高、中、低,包括大排檔、茶餐廳、酒樓、酒店,可是不知如何,感覺到水準下降了很多, 相信 wei-wei 女史在卡加利及多倫多都去過很多食肆飲茶食飯,除了卡加利水準比較參差外,多倫多的中式食品,水準甚高而且價錢合理,(比雲城平宜多了!),有否感覺有些食肆水平比家鄉還高?
愛民頓的中餐水平又比卡加利略高!
至於雲高華,粵菜水平,近年來已較為遜色,但是部份真的比起香江,是高一綫,(曾於香港某MX皇宫叫過一鴻圖窩麵,嚇死老鬼,賣相是一塌糊塗, 水汪汪,味道有如洗碗水!),香港食肆水平相信受到缺乏後繼者影響!
在香港最滿意一頓飯反之在一大道西小店享受到,這是一尼泊爾及印度餐館,大兒子及其朋友都已是"高管",請老鬼去的都是不便宜(甚貴)的食肆,可惜,食品水平絕不配對,而且服務態度是"香港式"的(應心照是如何,不能說不好,但絕對,,,,不舒服!)
在雲城,近年來"黃松"大量入侵,令到飲食業發生鉅大變化,滬菜、川菜、湘菜大量"入侵",而且很道地, 尤其滬菜,老鬼因在上海工作過,對滬菜情有獨鍾,對某些地道滬菜館,愛之!
至於清湯腩,這次回港,失望兩字,跟以前的完全兩樣,反之,這邊反而水準不錯!
wei-wei 下次過來,跟老鬼去試下,看看老鬼有沒有誇大(有可能㗎,老人口味改變了!)

四零後 說...

關於全民退保的問題,跟最低工資跟工時問題是甚為糾结的,老鬼絕對比那些躲在象牙塔內的社會學教授、政經教授、社會活動家、工會份子更有資格談, 原因我是草根中還要草根出身, 至今還是“基層”,想當年, 一年工作三百六十四日半, 每天六時至晚上十時, 現回頭過去, 對比今天, 老鬼已經感覺現時已經很理性,很平衡了, 再過了就是“過份”,凡事要從各方面看, 要在對方角度看一看! 人性是傾向好逸惡勞的, 就是如希臘、西班牙等每周工作三十多小時, 也有大多數人認為不滿意, 但是, 經濟成本呢? 社會發展成本呢?
全民退保, 問題是錢從何來, 現時社運及社工學究口口聲聲說香港“儲備”太多, 但從大局來說, 香港環境特殊, 尤其要維持“港幣”, 從金融及政治財經角度看, 反是極度不足, 連老鬼這不學無術, 小學程度的人都看到這問題, 為何那些才高十斗的社運及社科學者看不到?
香港人願不願意全民不論任何層面市民強迫每年要報稅呢? 強迫每年要報稅並不表示每個人都要納稅, 而是令官方了解你的收入狀況, 跟你的財政狀況提供協助, 有很多情形, 政府是跟這個對你提出援手, (這樣避免了有三無人士, 無人能知他們何在, 怎樣才能幫到他們!) 香港人又願不願意承擔“社會民眾責任”呢, 交“稅”呢?
現把我內子做”兼職”的粮單列出來, 看看家鄉人願不願意這樣負起”民眾”責任!
現時“卑詩” 省最低工資是十元二角半, 內子不是全工, 因為老闆蠱惑, 不願提全職工,
內子一期工資是630加幣, 加上代替年假金(即放棄放年假), 加班𥙷金56.25 即共713.70 從其中扣了政府全民退保金28.11, 就業保險金13.42, 預付入息税24.79, 即共減去66.32, 實際只得647.38, 如在工廠工作, 還要另付勞工意外保險!
上面的預繳入息稅, 在年尾報稅時是再作調整, 不夠要再加, 有多政府會退回多繳部份!
除上面外, 在卑詩省, 任何消費購物, 都要再付12%銷售及服務稅, 再另外, 電費, 煤氣費除了銷售及服務稅外, 還要付環保排炭稅, 開汽車的汽油, 除了以上稅外, 還要付“公車稅”,是用來補貼公共巴士, 地鐵及渡海小輪的年年虧損累累的敗家費!
呵呵,卑詩省還有付醫療保險費, 我兩夫婦因屬於低收入, 故此每月只付約一百元!
(註: wei-wei 的親友因住在阿爾拔省的卡加利, 稅項少和低很多, 醫療保險更不用付, 銷售及服務稅只需5%, 但該地天氣在冬天極度寒冷, 夏天又極度炎熱, 家人不願意留在那里!該省因為出產石油, 富有至極, 工資因缺乏工人, 因此, 甚高, 高於卑詩很多!)
這些稅, 香港人願意或甘心付嗎?
還有全民退保,你退休時是有上限的, 不是你付多就得多, 也是另一不“公平”, 它是刧富濟貧式的, 香港人甘心嗎? 老鬼因移民二十多年, 有時是自僱, 有時去了上海, 在加工種工資又不高,現時取得的只是每月二百餘元而已!
在卑詩省, 一個普通住獨立屋家庭的每月開支, 水電、煤氣、電話電視、垃圾環保及地稅, 保險等等要一千多, 食物及汽油又一千多, 沒有三千以上, 難過!
所以, 全民退保, 難題!!!
主要是“民眾”願意供款嗎? 再者你供了,可能享受不到, 你願意“奉獻”嗎?

Liu 說...

誠如 安兄所言: [HK人在福中不知福] , 光看到外國的[表面] 就以為外面處處是天堂.
如果樣樣都想學足人家, 後果如何 , 我都不敢想像了..............

四零後 說...

而家攞緊大家拿,連毛夾屎, 千二"女王頭",唔敢呻,仲好感恩, 好滿足,有啲對英女王唔住嘅心態!
不過!個個月要(大)出血,紅簿仔冧吧越來越細,再過幾年,要攪逆行按揭了!
家鄉父老兄弟都冇識死,成日話羡慕,成日話學,啲社運佬同政乜講啲唔講啲,紅生果又日日吹!死唔死,,,,

wei-wei 說...

安哥: wei-wei 食長素已近20載, 講真的, 即使青菜也難吃到菜味呢! ! ! 土壤、水份、種子都變了質。到茶樓酒館都是吃味精, 還是住家飯健康D. 在多倫多堂弟請晚餐, 那碟清炒芥蘭竟用味精炒, 睡到半夜, 喉嚨乾得要命。

wei-wei 說...

美國加州的税都好犀利, 不過我是七十歲的窮光蛋, 跟實個女在她夫家寄人籬下, 所以冇買任何保險。

四零後 說...

wei-wei,在美國逗留醫保千萬不要慳, 還要買足一些, 為什麼?我以前有個上司,退休後,有一次訪美探他的大兒子,不幸發生老人常見的病, 來不及撤退返香港,他亦生命力強,結果纒綿甚久,他在美幾個兒子最後被醫藥費弄到傾家蕩產!不要冒險!
這邊很多人周末都過美國購物或買菜,我甚少去,其實幾乎不去,原因,雖有買長期旅遊保險,但無謂,我省醫保只保非常少部份,况且全家對名牌免疫,又吃不多,最後對老美海關官員的傲慢態度非常反感,,,不去!

秋葉 說...

關於香港爭取了多年的「全民退休保障計劃」,最近有學者提出:既然「長者生活津貼」已經達到2千2百多元,和提議的退保金三千元相差不遠。何不實際推出這個全民退保計劃。
這個計劃是有利於所有全職的家庭主婦。因為主婦一生全力照顧家庭,並無薪金、強積金的利益。全民退保金可以幫到她們。
這個計劃如果實行,將會代替了綜援金、強積金等。有人認為可行,但反對的人甚多,政府早曾聲明不會改變現狀。
因為「全退保」是全民皆有,不審查個人資產,可能因此故不獲得大多數人的支持。

wei-wei 說...

安哥: 我是持綠咭來加州的, 所以情況跟你上司的爸爸有點不同。加州政府對我這類只持綠咭未入籍的新移民也不俗, 我可在本鎮乘坐免費公共巴士, 我也享受免費醫藥(高血壓和膽固醇)及每半年驗一次血。

Liu 說...

[羊毛出在羊身上]
最低工資, 失業保險 , 綜援金, 全民退保......................
正如安哥所云: [錢從何來?]
當洗碗的都一/兩萬一個月的時候 , 妳以為妳每天吃的飯麵還會是一樣的價錢 ?
當掃街的都一/兩萬一個月, 妳以為妳的[環保費] 是多少 ?
當失業保證金提升的時候 , 妳以為妳的科稅金是多少 ?
政府提供的每種[福利] , 錢從何來?
[順應民意] , [慷他人之慨] 這個政客最懂, 反正[左出右入] , [財來自有方] : 入口稅, 銷售稅, 附和稅, 增值稅, 地稅, 環保稅.........................
妳以為自己窮就可[ 逃出魔掌] ???
除非妳遠離這社會 , 這世界 , 不然, 妳或多或少都要奉獻.........
[柴米油鹽.......]
連篤串魚蛋妳也走不了..........................

Liu 說...

有時候真覺得故鄉這一代真是 [ 被寵壞的一代] , 一直在發那[ 黃梁大夢].
他們也不想想故鄉現在靠甚麼同人競爭 ?
人力 ?
不講上面, 就是[左鄰右舍] 的都有平過你的.
人才 ?
咪以為你個幾句[賓妹] 英文可以 [ 獨行天下]
深水港?
金融中心?
轉口貿易 ?
得閒上去行下, 同班你們口中心中的[鐵幕之下的鄉下仔]傾下世界觀文學觀經濟觀................................
冇時間冇時間上去?
上去人地D 網睇下,
睇下人地D論據觀點..................
不過千萬不要講唔過人就3句唔離2 句就表現HK人本色:
搵人XX

四零後 說...

wei=wei, 哦,咁比較楓葉卑詩省好好多咯,好多人成日話加國福利好,其實係瞎子摸象,加國跟老美一樣都係聯邦制,每個省好多哩係"完全"唔同,唔好死口話我地係咁,咁,咁㗎,安省多倫多醫保不用交任何費用,配藥只須一百文墊底,卑詩醫保要俾錢,年年加費,配藥基本全部自己,補貼要睇年收入,仲有用過成二千文先至有.有啲係卑詩省嘅人有時俾佢激死,點解,佢地好彩,搵到啲工有extend Medicare,佢地公司,機構,公會同佢地做多份"私人醫保",咁唔係有多啲著數,有啲公司同機構同佢地俾埋政府醫保,咁,佢地又唔睇清楚,屎忽鬼猛咁"衣錦榮歸"返到去鄉下,大搖大擺話乜都有,連㩡骨都包埋,認屎認屁,,,,我地冇咁嘅褔份,做唔到呢啲好工,惟有嘆氣!!!
美國加州,八十年代已有人請我去工作,去過一個月,睇唔到有乜好,走返轉頭,跟住幾次啲老友都叫我過去,,,,唔知點解,受到"某"啲影響,始終對老美冇乜好感.......個人思想有問題也!

wei-wei 說...

安哥: 如果你當年以工作移居美國可能今天所得的福利不及加國好, 而且每個州的福利都不一樣, 並隨時改變, 變得越來越差, 我目前所得到的, 不知明年是否仍保有。wei-wei 不擔憂太多了, 做日和尚敲日鐘吧!