2016年4月7日星期四

到處楊梅一樣花, 到處烏鴉一樣的黑,世上那有桃源? 家醜本不應外傳...不過

 圖中妹妹係揾緊順嘢, 婆婆呢,困咗係華埠幾十年,算咯。
每個星期天, 市府撥出一條街,俾的得道之去銷售佢地一星期的收獲, 如果好運的,會執到新嘢,乜都會出現,新衣、新鞋、名店食品,例如朱古力, 不過"唐人", 不論老華僑或者新移民,唔會去嘅, 有的唐人一世都唔會去,甚至唔知有呢度, 皆因一到埗便會被警告,呢度係"地獄"。
愛滋、肝炎等等傳染病太多,正苦怕晒,所以已經係派針筒, 本來要派埋白粉, 不過真係太過份, 被人鬧得太犀利,暫緩執行。
老老老華僑講古仔,呢區係和平後係不夜天, 雲城最旺、最繁華地區, 自從大左膠杜老多搞咗個全世界,全人類最最最偉大, 最人權,最法治,最民主嘅自由憲章之後, 人權大個天嘅環境, 逐漸玩完, 成了人間煉獄, 地獄!
最近一二年, 開始有少許改變, 冇咁張揚,點解,死咗唔少之故! 不過又開始外省驅逐過來又多咗, 其他省分好契大, 送埋灰狗車票,送佢地嚟,原因,這兩任的市長又係大左膠!
尋寶, 睇下有冇人打完的針,仲留有料冇!
每逢初一、十五,遍地"累低"男女, 知道點解嗎? 下面同你講!
係雲城做差人, 心腸特別改做過, 已經唔會係"人", 只係機械人!




本來家醜不應外傳, 不過又有老友呻,家鄉點唔好,點樣壓力大,多打壞,人多黐綫喎, 老鬼包拗頸, 成日話家鄉係人間天堂, 如果唔係,點會有三十幾萬入咗加籍嘅男女都回流,包括我大仔, 老鬼成日叫佢地要惜福, 唔好井水犯河水,唔好睇689, 要睇,睇六合彩,即係我呢面嘅六四九,佢紅色,佢嘅事,最緊要紅色放水, 689肯真係八萬九, 人人上樓,理得佢係唔係"九"!

如今,搞來搞去,搞到自己唔知點解無端端咁嬲, 又係萍果食得多過頭!唉,咁,好容易"早透"。

講返雲埠, 其實係以前大左膠杜老多遺下嘅蘇州屎,人權憲章,你地有時間,去上網睇下講乜!

大鑊在,呢個所謂憲章,如霧又似霞, 像露又像花, 成篇嘢, 無零加兩可, 任你點解讀, 任法官點闡釋, 咁!大劑, 楓葉原來除咗楓葉之外, 出好多"梁九杰","余藥媚","李處冥"之流 , 狀棍,訟棍,乜嘢法律都打餐死,(唔同香港,未見律師先交錢,楓葉係打完有著數大家拿),最殺著係一出咒語"人權憲章" 冇明文講話唔得噃? 咁,瞓緊覺嘅法官(終身冇得炒嘅) 一醒,大筆一揮,放人!

所以, 上面講過,呢差人,做到冇癮, 最好就係去抄牌, 無閉翳!

人權大過天,要拉白粉,係要差人睇住佢地兩個, 一手交一手, 當塲執到先至叫夠料"叉處",咁!即係唔使拉咯!

食白粉係冇罪,點解? 人權! 唔準捉去戒毒! 點解? 人權!

家陣通街大麻, 點解唔捉? 藥用呀嗎! 又係人權,

乜你地唔係直選嘅咩? 多黨噃,一人一票噃? 唔鍾意唔係選過第二個?

唉! 講多無謂, 以前老人成日講, 筲簊冚鬼一窩神,七個字講晒, 人又係佢,鬼又係佢,幕後又係佢, 人民平時唔知邊個打邊個,到換屆前,出嚟浮浮頭,吹下水, 你選我啦,冇錯架!你要乜,我當選後就俾乜! 盲頭烏蠅, 選咗佢, 馬上係社區唔見咗影,地税加,水費加,車票加, 走去"調佢", 一句名言, "你地選我咖嗎,即係俾權我做嘢,係唔係?唔锺意, 下次唔好選我囉!"(唔係砌生豬肉咖,真人真語)

唔再講唔啱"康趕"人唔啱聽嘅,講番精神病患者,食白粉多梗係黐綫, 醫一個黐綫嘅,正苦要用好多錢, 本來雲城有一間好大,好大,好大嘅精神病院, 但係用錢太利害,正苦頂唔順, 有軍師整咗條好有理由嘅左膠橋, 佢話,困住佢係醫院醫,斷唔到尾,佢地接觸唔到社會,即係冇機會再正常,解散咗間醫院,俾佢地溶入社會, 呵呵,一拍兩散, 從醫院結束果日, 雲城露宿者大增, 幾千人!!!!

好多人成日話楓葉好福利, 又係頂住個心, 其實好在楓葉正苦都幾坦白, 佢地整咗個網,係方便國民知道大家拿會有乜, 另外,你地要做乜,自己上網自己搞掂, 所以,唔好聽我吹水, 自己去睇下乜嘢係加國大家拿,係唔係好似李灼人, 陳人舊咁亂吹水, 尤其陳大舊,百分百加拿大人, 全家除咗佢,都係加國生活,呢條友,唉,信佢?不如睇下Canada Service官方網站!

雲城正苦同班修道人士好鬼合作,邊度都唔會去, 只係係唐人埠側邊活動生活, 老鬼曾在此吹水找出路, 所見所聞,心痛兼心實,今時今日唐人街已是人老珠黃,冇唐人會去,主要是怕咗修道者,另外,如烈治文,本那比等都已經發展新一代唐人魔, 邊有人再去又乜又物唐人街?

到處楊梅一樣花, 到處烏鴉一樣的黑!

香江,其實比較好多地方,好好多,就是醫療,艱難大醫療系統? 睇下你好唔好彩???
老鬼以前都講過,有一次,工友剧木中咗招,流血不止,安全工友冇咗符,老鬼送佢去醫院急症室,下午三時多, 最後下午八時才有醫生照料,血都乾了!!!!又係果句,家醜不出外傳! 不過睇見家鄉父老成日乜都鬧689,有的…………我唔係幫佢,唔好誤會, 只係………。

最後聲明,加拿大係天堂, 如果你的親友是工會工,公務員,公用事業員工,巴士司機, 渡輪水手, 郵差, 警察消防, 尤其係"運輸聯網警隊成員",加拿大係天堂中的天堂, 做人無怨! 人間桃源, 老鬼先此聲明, 只係果的唔上進,無後門嘅人先至會咁衰,抱怨加拿大, 仲有,香江退休D8及以上公務員來説,加拿大係天堂中的天堂再高一層次,加拿大萬歳!!!

所以唔好瞎子摸象,加拿大尤其雲城, 天氣好, 空氣好, 飲茶好,食晚飯,好過香港好多倍,日本菜又係, 西餐更正,又可以跳老舞,唱粵曲,又可以睹塲操兩手, 又可以夏釣魚,冬滑雪,秋行山, 春遊輪!

唔好話老鬼剩係會唱衰加拿大,好似某些人一定只唱衰香港咁!老鬼好公平!

5 則留言:

大夫行傳 說...

91年夏跟美加園18天遊
在溫哥華離團
買了30日灰狗
橫渡溫,愛,沙,緬,安,Q南六省
旅遊探親 , 探路 ,探盤
發覺年青專業中產,坐完監必回港 ;
年長勞工無產,變了加拿大,大加拿 ,
當時才1800萬人
現時有3000萬人
夏天都悶
冬天冬眠
寒濕患者多
窮酒鬼
飲加鹽米酒
租康趕錄映帶
真是修道人間

匿名 說...

香港泒美沙酮,白粉差不多.

四零後 說...

美沙酮已經派幾十年,唔使排隊唔使錢都冇人飲,倒多過乜,原因係唔夠"勁",今時今日僑居地海洛英已經換了唔知幾多代,冰,天使之乜之物,毒品種類多個乜,主要係冇得拉,拉咗都會證據唔齊,法官大人同"康趕"今時今日嘅法官一樣,有疑點利益歸被告,而且法官資料係公開,某些人士係槍械滿手的,唔使講都應該明!
再講一句,父老兄弟姐妹,香江好山好水,惜福呀!唔好睇咁多生果同公信力報,唔好人講你又講,睇清睇楚發生咗乜事!不過老鬼講都無謂,一句過來,挑!你梗係講風涼話啦,匿係楓葉,做息魔,享受陽光空氣,丟!都唔知我地"康趕"亂世,正一KT
以上拍磚,哈,老鬼受晒!!!不過如果楓葉咁鬼好,個條乜大班同乜大舊,點解唔返來而係香江揾香港著數!

大夫行傳 說...

楓國南本士六省
嚴冬零下幾十度
地博人少資源多
愛省班芙露易斯湖
真是修道仙境
若大麻合法免稅
更能吸收有財中產

四零後 說...

今時今日,本省及安省中醫業非常興旺,如果當年你願意留下,相信發展更大!
這邊西醫對中醫非常尊重,正苦亦大加扶持,官方大學已經開中醫學系。
西醫生很多時候推薦病人去找中醫尋找另外意見及療法。
管理日漸進步,黄綠已經無法生存,這是老鬼對楓葉讚的極少東西之一!
本省註冊中醫及針灸師,一半以上是本土西人,佢地對中醫的研究同學習,又係老鬼偏見,係認真同實在過唐人!
中醫業界對中醫最睇唔起同傷害嘅反是本身是西醫的大六人,尤其北佬,佢地被迫用中醫搵食,郤好以方舟子果個契弟咁,成日跴中醫,食碗面,反碗底。
楓葉貪污腐敗極為嚴重,不過佢地聰明同埋古惑得多,冇大六的官咁鬼蠢同儍,但係好少唐人,尤其香港移民會留意及理會,主要都係息魔或者"避開"正治,眯埋對眼做人,郤日夜睇住生果。