又係往事難忘記,舌尖上的固執, 點解家陣雲吞麫無咁好食?

日昨, 有網友介紹某食肆, 主打竹升麫, 標榜懷舊風味及傳統味道, 老鬼生性頸, 一睇圖片,打麫師傅一身厨神打扮,靚仔過靚仔, 打麫姿勢媲美瑜珈大師,心中已一涼,再看看圖片介紹之湯底, 混混濁濁, 未有機會食都已搖頭,再讀內容, 又係强調蝦夠大,咁………老友一盤涷水潑過去,攪到Mei姐唔好意思,代我向網友謝過及道歉, 呢次真係老鬼唔啱,强把自己幾十年嘅食古不化强加今時今日潮流, 百分百老而不!

不過,幾十年前冇乜嘢食嘅記憶,有得食乜都好食啦,係唔係咁話!

講起雲吞麫,點解老鬼依然記掛往昔滋味? 原因是那個時代,沒有今時今日嘅衛生常識及營養學知識, 求其食得落口就係好食。

想當年,夏天時還未有冷氣, 大熱天時,打麫佬一路搵竹升打麫,一路汗水豎流, 無可避免梗灑咁的落去麫種度啦, 另外, 果陣時,無人知吸煙係無益嘅, 尤其基層百姓,煙仔係人生最大安慰, 乜人做緊嘢都會担住口煙, 打麫師傅唔在講,一煙在口, 咁樣, 扢下扢下, 的煙灰不知不覺又跌的落去麫種度, 咁樣咁樣,果陣時打出嚟嘅麫梗係好食過家陣啦!!!

不過湯底,真係唔知點解,以前不論大排檔, 担擔小販, 舖頭唔在講咯, 都係清澈透明,毫不混濁, 兒時在伊利近街隨街走時,見到麫檔老細,一早用火燒大地魚,用嚟做湯料, 又蝦売又豬骨, 熬幾個鐘, 其實要湯底出嚟清澈不混濁,好簡單咋, 不過又係果句,今時今日,咁鬼麻煩,邊個會去做?

老鬼長氣滲氣, 對雲吞嘅要求係唔好咁鬼大隻蝦,咁多蝦! 一定要有枚頭有肥肉,有大地魚,有靚胡椒粉,肉與蝦比例要合乎道德, 如果唔係,一味係蝦,使乜要用皮包???直接食蝦仲夠蝦味! 係唔係咁講。

以上乃理工某大學教授所指,老人要早死早著,唔好拖累時代巨輪的偉論中的人板的落伍垃圾言論,後生一代當如呢條友黐綫,算了。

去年,返港,走去舊時地方,食魚蛋粉, 又係得一個“世界變了”的感覺, 又係老鬼固執, 以前用手打的真係唔同, 又係不過, 當時不以為焉, 今時今日如果用番以前打魚蛋嘅做法及環境,後生一代話,你食埋我份。

為什麼以前手打魚蛋咁鬼好食,其實好簡單,唔夠衛生之故. 點冇衛生法呀? 嗱,汗水、口水、鼻水、煙灰……………騎騎!


再補充雲吞麫

點解有的雲吞麵咁重梘水味？

呢個就係淥麫師傅嘅責任咯,理論上,在第一次淥麫後,要過冷河,用清水洗去麫中梘水,仲有,第一次淖麫時,火候要掌握得好,要有七八成熟,,咁的梘水才會揮 發出來,係過冷河後,才再把麫淖至九成幾,呢個時間,要加熟豬油,先放入碗,麫未入碗前,已經放進淥熟了的雲吞,加夠熱嘅湯底,咁,廣州式雲吞麫嘅美味及 口感先至完美。

所以淥麫師傅對一碗雲吞麫好壞有絕對影響, 一般懶嘅師傅求其咁閃一閃水,的水成日都唔換,咁,成碗麫的麫點靚都死,老鬼試過好多次,的友仔連冷河都唔過,就咁出貨,死唔死,有的食肆,連個冷水皿都無,果碗麫,唔使要咯!