八十年代,某市鎮忽然冒起名牌雞粥,好多人以為他是創起人,其實不然,七十年代在旺⻆某街道,晚上有一粥檔,只賣一樣,雞粥。
這檔粥是用粥底淥熟的雞,粥淥白切雞,然後挂起,斬件,再加上“扶翅"(即雞腎, 雞潤,雞腸等),你叫粥時,放下雞件,扶翅,用充滿雞鮮味的淥雞粥整幾嘢,再放乞兒菜,嘩,在冬天時,乜仇都報!
車仔麫,今時今日已經被搬上神枱,有地位咯,但係六十年代,車仔麫的而且确, 确而且的是草根、基層,弱者的靈魂慰籍者,想當年,基層打工多要宿於工廠,當年在元洲街做工, 收工一定冇九點,就係十點,收工後唯一消讉,一係去廟街,一係睇廟街文學作品,近近地走去九巴車廠,步陞鞋廠街頭,小販雲集,都係做工人生意。
最經濟係食碗麫,車仔檔,麫是最平最"妾"的全蛋麫,(不是雲吞麫的爽麫),"忽"壳碎牛腩(是把交肉食公司的牛腩處理下來的碎肉),一文搞掂,袋中有銀時,濶佬加多幾毫子蘿蔔、豬紅、豬皮,啱啱出糧時,再加幾毫所謂鵝腸,其實雞腸,車仔麫就係咁簡單,冇今日的豪華富貴。
老安堅持不喜某些雲吞名店,雲吞基乎全部係蝦,最討厭,當年家居對面係雲吞麫大排檔,晨咁早,燴大地魚,香到摷醒你,睇佢地做雲吞,記憶尤新!
兒時,住中環,有時老豆出糧會出去搵嘢食,最印象深係係中央戲院傍橫行有一粥檔,當年有一粥叫大蝦粥,正到無影,一碗粥,兩隻大中蝦,生滾,標晒的蝦膏係碗粥,白粥變紅粥,香,爽,鮮。不過,自搬到西環後,從未回頭,只餘記憶。
又是當年情,一個幾毫可以填飽肚,打冷大排檔,三毛子芽菜,三毛子豬頭肉,三毛子白飯,最貴條魚,五毛子!
鴨腿湯麫,於今尚有,不過完全係求其加是旦,有一次,鴨竟然皮暖肉凍,嘥氣,記起好耐,好耐之前,深水埗有一間叫新合棧的食肆,那裡的鴨腿湯麫一絕,鴨香肉嫩,湯底夠味,麫夠爽!後來冇咗。再到八十,九十年代,灣仔老牌茶樓,有用燉盅出枱的上湯鴨腿麫,食法不同,但其陳皮夠香,鴨腿夠稔入味,不過,又係冇咗,連間茶樓都冇埋,如今那處還有古法陳皮鴨腿麫呢?
講飲食懷舊,不是樣樣過癮,當年有三數間茶樓,去過都怕,怕乜?
怕人,怕小人,怕小人物,怕思忽鬼,那些食肆的企枱,茶博士,一眼便掃到你有冇資格去佢打工的地方食嘢,飲茶,佢地好叻,瞄一瞄便知你龍與鳯,佢地以專業眼光判咗你敗訴,要開茶? 等陣,阿叔唔得閒,跟住佢仆到去擦乜乜爵士對布鞋!
