真係不吐不快,於今香港的報紙,不論老闆也好,編輯也好,文字記者也好,攝影記者也好,莫講文字拙劣,鏡頭散漫,而係大部份只懂掛羊頭,嗌新聞自由,實際係爛泥一大堆,只會叫口號,揭陰私,捕風捉影,創作話題,憎人富貴嫌人貧!
生果報無謂講,佢地跟本唔係辦報,係收人錢財,替人潑災!果個總編,枉費佢話係中大受教,但係行事跟校歌校訓,背道而馳!
佢老闆,如果以家陣啲民粹青憤嘅標準,佢冇資格為"人"(香港人),咁!點解冇人嘈佢好似嘈女歌手咁呢?唔明!
今日想吐的係香港果份"日出報",老人家唔出聲唔舒服,自從去年頭消防當局接到投訴去檢查該報館後,從第二日起,就係佢地份報紙,日夜謾罵消防當局,雞蛋挑骨頭不特止,小事化大事,傳說寫成真,日日如是,天天如此,呢啲行為,絕對係公器私用,公報私仇,係新聞自由嗎?有新聞道德嗎?
無事找事,有乜"差池",博命放大,如果冇嘅,又去亞芝亞左創造出嚟,連電腦平台嘅用法都會攞出嚟放大幾百倍去鬧一餐!
佢地的編輯受嘅係乜新聞訓練?佢地嘅人格值幾多錢?佢地咁做對社會有乜好處,啲編輯記者係唔係為咗果一萬幾千,或者十萬八萬,可以係咁嘅"老闆"跨下"偷生"?
廣東佬有句好粗鄙嘅俗語,"臭罌出臭草", 真係冇乜講錯,呢間日出報創辦人係乜水,老香港心知肚明,可惜,成個家族都唔識得"發財立品"呢四個字,而打佢地工果班"新聞"莠草編輯記者,同生果報果啲,又係一樣"臭罌出臭草",佢地果啲大學講師就係"臭罌"!
新聞自由已經被呢班人扭曲斷送,變咗係佢地無恥嘅盾牌!
新聞道德已經被呢班人轉形成為,新聞"盜得"!新聞任由佢地盜取扭橫折曲而佢地嘅利益由此可得!
又,有咁嘅市場,就有啲咁嘅"垃圾"報紙產生,如果香江嘅讀者有"腦",有"心"嘅話,嘅洗頭水,化妝品商家如果唔係咁冇品味,去落啲廣告俾呢啲"垃圾"報紙,咁,佢地會"生性"啲嘅!
無奈!
誓死保衛"新聞自由",就要杯葛呢啲報紙,致力維護"新聞道德",就要大換血,換走啲肥佬乜,肥佬物同埋呢啲"唔乾淨"嘅老闆,踢走果啲"讀書不成三大害"嘅編輯!
香江好奇怪,文人無行,於今為烈,據講如今係中華文人圏最有才氣,學灌中西嘅乜乜橋,竟然會係呢個肥佬度做份嗌吔總老總,而果位厠紙才子又係果度打躉,咁,你話"文人"係唔係"臭老九"!
消防查牌係佢地嘅責任,如今竟成"報仇"謾罵對象,消防人員係香港嘅貢獻,係有眼都睇到,老人家真係唔抵得頸!
5 則留言:
大哥,千祈唔好咁客氣叫細佬做"先生",細佬基層過基層,草根過草根,文化不高,粗鄙人也!
講起生存,其人大把地方同平台生存,而且中產生活應無問題兼機會,所以細佬"不恥"其人有因,而且其文字及味道,以細佬性格,冇乜好感,冇乜共鳴,嫌其矯揉造作,虛情假意(係細佬偏見,冇解!),其譽之高,細佬認為不合!
關於人言報老闆,木某人,未發跡時,常到細佬嘅工作地方探我師傅(曾半足踏入咗新聞界)及細佬之師友,相當時,已對其人不太好感,後嚟呢位仁兄欺師滅祖,對大俠之攻擊,(大俠睇錯人也,供書教學,最後反骨,此是後話), 後嚟細佬轉業行街又曾同佢地有接觸,嘩,佢"內助"更加驚人,一字曰"絕",細佬敬而遠之!
又係想當年,師傅輩雖然都係"做"新聞,但係仲有啲"正"氣!佢地有時都會自嘲話佢地自己係"文化乞兒",呢四個字,估唔到幾十年後竟成該行業之真實寫照!
而家好多人鬧孔夫子,鬧儒學,其實佢地有冇真係讀通四書五經?聖經也好,可蘭經也好,千字萬字,大都叫人向善,但係梗有啲文字,語義不詳或有反調,而有"心"之人,好嘅唔學,去攞啲唔好嘅去放大,咁!唔係就出咗塔利班,香港就出咗啲明光蛇,果個所謂牧者,一臉"朱熹"樣子,其實唔係同朱熹一樣,講一套做一套!牧者係叫人向善,佢就叫人"抗命" 唉!講到呢度,亂鬼晒,不過真係千祈唔好再睇鄉新聞,嘔血,,,,,楓葉一樣,貪,奸,賤,呃,啲政客同官員,同"國企"同某啲工會,又係淫穢賤殘,無計,人嚟㗎嗎!有冇烏鴉係白色嘅?眼係黑,錢係白,,,,唯有日出而作,日落而歸,等最後審判吧,,,今日汽油超過一元五角咯,,,有一元去咗省府買㗎啡同巴士佬工會佬"合皮"!真係世上無桃源!!!!
細佬真係做過黃皮狗㗎,不過唔係好長時間,做唔落去,兒時,親見洋人揹星(果陣時係真係用星唔係用花㗎)幫辦皮鞋跴番茄,腳踢黃芽白,手揮指揮棒(家陣都冇人知道乜嘢係指揮棒)鞭打賣菜嘅三嬸,另一手指手劃腳,啲黃皮狗,頭耷耷,拉拉鎖鎖,,,,洋人老大叫你做嘢係用隻食指,勾你過去,,,,,
不過你講呢啲,冇人信,冇人聽,反之肥佬呀,大班九呀,蕭公子呀,李大口妹呀,陶厠紙呀咁嘅人講嘅,就大把人信,,,,咁!即係點,,,,,,,,收聲睇四仔!
發佈留言