世界立立亂, 乜交叉都變, 是非無對錯, 糯米無雞件。
大包已唔見, 樓貴點心賤, 豬潤無黃沙, 製作不及前。
灌湯應裡面, 皮薄湯水甜, 如今水浸過, 哎落味精先。
點心冇樣掂, 茶葉更神仙, 間間都求其, 埋單似搶錢!!!
老安固執, 始終腦死板, 無法接受新鋪店, 總係只識懷夾念!
年前,回港還可以去深水埗乜興茶居懷下念, 前年執埋說再見, 走去乜香試下點, 茶差點心奀, 人多似走鬼, 點心一出齊搶奪, 餓狗搶屎仲要俾錢!
大兒孝心請到名店, 老安衣衫不整周身囉囉鬈, 喼頓眼似白鴿轉又轉, 點心精緻到一陣味精甜, 古靈精怪叫做炒粉麫, 埋單唔使我出老安依然肉赤到心脏典又典!!!
唉!唉! 唉!武昌唔好計, 高陞得雲襟江雙喜夠人齊, 六國英京頂架勢! 水滾茶靚點粉麫食極唔會覺得滯!最懷念屈地街永春茶室, 包靚點心正, 尤其淮山雞扎係睇住佢地係天井劏活雞!!!
鞋!!!俱往矣,
紅日東升夜落西,
愁將白髮唱黃雞,
海漂猶記當年事,
老安唔化今又提!
2 則留言:
這種大包在十年前，蝶村公屋的大牌檔，在早上有一大籠發售，料足味美，遲一點去都買不到。不知現今還有沒有 ?
自從有過禽流感，全港已經只賣冰鮮雞。豬潤膽固醇高，已經沒有了地位。
俱往矣 !
一般美食已難尋，除非遇到好廚神。
光蔭荏苒匆匆過，共話當年有前因。
哈哈, 無奈何也!
發佈留言